Gjykata e Lezhës ka liruar nga qelia katër personat e arrestuar pak ditë më parë të cilët protestuan për ndalimin e ndërtimit të HEC-it të Mirditës.
Togat e zeza kanë vendosur masën e sigurisë “detyrim paraqitje” për Besnik Pacin 48 vjeç, dhe tre aktivistët e lëvizjes Vetëvendosje në Shqipëri Etnik Berisha, Endrit Bytyqi dhe Çlirim Gerbeshi.
Përfaqësuesi i tyre deklaroi në përfundim të seancës se ata u akuzuan vetëm për një akt qytetarie.
“Gjykata sot vendosi që për katër të arrestuarit të jepet masa e sigurisë detyrim paraqitje. Banorët bënë disa thirrje dhe policia e ktheu në protestë. Është akt qytetarie të protestosh sot kur nuk ka mbetur asnjë lumë pa u marrë. Të arrestohesh për një deklaratë për shtyp do të thotë se jemi afër një diktature. Prokurori kërkoi burg pasi Besim Paci qenka I rrezikshëm pse proteston për një të drejtë”, deklaroi ai.
Protestuesit kanë kërkuar nga qeveria që të anulohet kontrata për ndërtimin e objekteve në lumë me pretendimin se do të sillte dëme.
