Në një moment kur rendi global është i tronditur nga konflikte të shumta dhe tensione të shtuara gjeopolitike, presidenti i Serbisë, Aleksandër Vuçiç, rikthen në qendër të vëmendjes një nga plagët më të mëdha të Ballkanit raportet e brishta me Kosovën. Në një deklaratë të bërë gjatë një interviste për televizionin shtetëror serb, Vuçiç lëshoi një mesazh të koduar por të drejtpërdrejtë: Serbia, sipas tij, do të dalë fituese në çështjen e Kosovës.
“Gjërat po ndryshojnë ngadalë në botë. Dhe nuk do të them se çfarë do të thotë kjo, por në fund Serbia do të fitojë. Jam absolutisht i sigurt për këtë”, u shpreh Vuçiç, duke nënkuptuar një ndryshim të mundshëm në balancat ndërkombëtare që sipas tij do të favorizojnë Beogradin.
Deklarata e tij vjen në një kontekst të ndjeshëm, ku zhvillimet në veri të Kosovës, përfshirë arrestimet dhe deportimet e serbëve, janë bërë objekt debati dhe tensioni. Duke përdorur gjuhën simbolike “nuk do të duhet shumë kohë që uji të rrjedhë poshtë Savës dhe Danubit” Vuçiç shfaq një retorikë të njohur të së kaluarës, ku nënteksti shpesh flet më shumë sesa vetë fjalët.
Serbia, pavarësisht presioneve ndërkombëtare dhe dialogut të gjatë të ndërmjetësuar nga Bashkimi Evropian, vazhdon të mos e njohë Pavarësinë e Kosovës. Përpjekjet për të arritur një marrëveshje përfundimtare kanë prodhuar vetëm marrëveshje të pjesshme dhe shpesh të pazbatuara, ndërsa Brukseli e ka bërë të qartë se normalizimi i marrëdhënieve mbetet kyç për integrimin evropian të të dyja vendeve.
Në këtë atmosferë të tendosur, deklaratat e Vuçiçit nuk shërbejnë për qetësim, por përforcojnë ndjesinë e një konflikti të pazgjidhur, që sa herë shfaqet në horizont, risjell me vete frikën se e kaluara në Ballkan mund të mos jetë aq larg sa mendohej.
