Shpërndarja e fotove të kafshëve të bukura në rrjet është mënyra më e shpejtë për të afruar njerëzit dhe forcuar marrëdhëniet mes tyre
Në një studim të ri, shkencëtarët kanë zbuluar se ndarja e imazheve të kafshëve të lezetshme nuk është thjesht një kënaqësi për syrin, por një formë moderne e shprehjes së dashurisë dhe afrimit social. Ky veprim, i quajtur “guralecimi” (nga fjala angleze pebbling), është një sjellje e ngjashme me atë të një specieje të veçantë të pinguinëve, të cilët i dhurojnë njëri-tjetrit gurë si shenjë afeksioni.
Sipas profesoreshës Ghalia Shamayleh, që drejtoi studimin në bashkëpunim me profesorin Zeynep Arsel nga Universiteti Concordia, kjo sjellje tek njerëzit shfaqet përmes ndarjes së përmbajtjeve vizuale në rrjetet sociale. Një video me dy foka që përqafohen, një mace që fle mbi tastierë, apo një qenush që vishet për Krishtlindje, nuk janë thjesht momente gazmore – ato janë sinjale afërsie dhe dashurie.
Shumë përdorues të rrjeteve sociale ndajnë përmbajtje me kafshë për të forcuar lidhjet me miqtë dhe të afërmit. Këto postime shoqërohen shpesh me humor, përkëdheli gjuhësore ose krahasime të personalizuara.
Studiuesit kanë vëzhguar se përzgjedhja e postimeve për ndarje nuk është e rastësishme. Njerëzit analizojnë shijet dhe preferencat e marrësve, për të ndarë përmbajtje që u përshtaten emocioneve dhe historisë së përbashkët. Në këtë mënyrë, një video me mace mund të përçojë kujtime të përbashkëta apo momente intime të së kaluarës.
Në jetën reale, kafshët funksionojnë si “lubrifikues social”, duke afruar njerëzit përmes reagimeve të përbashkëta. E njëjta gjë ndodh edhe në botën digjitale, ku imazhet e kafshëve jo vetëm që sjellin buzëqeshje, por krijojnë lidhje të reja dhe përforcojnë ato ekzistuese.
Një aspekt tjetër i rëndësishëm është përdorimi i “Petspeak” – një gjuhë e stilizuar me përkëdheli, që përfshin fjalë të shpikura dhe lojëra gjuhësore për të krijuar ndjesi afërsie dhe argëtimi. Kjo gjuhë, së bashku me përmbajtjen vizuale, krijon një përvojë të personalizuar që lehtëson komunikimin emocional.
Studiuesit vënë në dukje se veprimet e tilla nuk tregojnë mungesë intimiteti, siç mund të mendohet, por përkundrazi – janë dëshmi të kujdesit dhe vëmendjes ndaj tjetrit. Kjo sjellje është një mënyrë moderne për të thënë “po mendoj për ty” pa fjalë të drejtpërdrejta.
Pra, herën tjetër që të shihni një imazh të një qenushi me sy të mëdhenj apo një mace që rrotullohet në diell, mos ngurroni ta ndani. Një veprim i vogël mund të nënkuptojë shumë për dikë që ju doni.
