Greqia ka nevojë për krahun e lirë të punës që i vjen nga Shqipëria dhe që përqendrohet kryesisht në bujqësi e ndërtim.
Qeveria greke ka shtyrë deri në 31 dhjetor të këtij viti, lejen e posaçme për punonjësit sezonal.
Qarkorja e posaçme është dërguar pranë drejtorive të decentralizuara të emigracionit, në prefektura.
Ato urdhërojnë drejtoritë e emigracionit, të pranojnë aplikime për punonjës sezonalë, deri ne 31 dhjetor 2020.
Qarkorja sqaron se, mbetet e pa ndryshuar procedura.
Pra kushdo punëdhënës në sektorin bujqësor, dëshiron të punësojë një emigrant nga vendet e treta, mund të kryeje aplikimin.
Ai bëhet pranë zyrave të decentralizuara të emigracionit, në prefekturën e zonës që banon.
Ai duhet të plotësojë një deklaratë përgjegjësie për punëdhënësin, me detyrimin e gjetjes së banesës.
Po ashtu, duhet ta ketë të siguruar të paktën 20 ditë në 3 muajt e ardhshëm, si dhe të paguajë një taksë legalizimi 100 euro për punonjës.
Po ashtu, pronari duhet të sigurojë kushtet e jetesës për punonjësin sezonal.
Procedura kryhet brenda 48 oreve nga dita e dorëzimit të dokumenteve.
Me këtë shtyrje,mundësohet hapja e tregut të punës për mijëra emigrantë shqiptarë të interesuar për punësim sezonal në Greqi.
Që prej fillimit të kësaj procedure në maj të këtij viti, në sektorin e bujqësisë në Greqi janë punësuar me shumë se 30.000 emigrantë.
Shumica dërrmuese e tyre, janë shqiptarë.
Kërkesa më e madhe për krahë pune ka qenë kryesisht në zonën e Veriut të Greqisë, në sektorin e frutikulturës.
Shtyrja e re, pritet të mundësojë punësimin për muajt e dimrit për mijëra emigrantë, të cilët pritet të punësohen në mbledhjen e frutave.
Ata përqendrohen në zonat e Larisës, Volosit, si dhe për sezonin e mbledhjes së ullinjve dhe portokajve në vjeshtë.
Në këtë mënyrë, Greqia mundëson gjetjen e krahut të lirë të punës, në procese të cilat nuk preferohen prej vendasve.
Pavarësisht se prej krizës së Covid-19, parashikohet rritja e papunësisë në vend me mbi 100.000 persona.
/Gazetaatdheu.com/
