Një punëtor me origjinë shqiptare, rreth 50 vjeç, ka humbur jetën në një aksident tragjik në vendin e punës, në Laigneville, në departamentin Oise të Francës. Ngjarja ndodhi të premten, më 9 tetor 2026, rreth orës 11:30, në një banesë ku ai po kryente punime për rikonstruksionin e çatisë.
Sipas raportimeve të mediave franceze, përfshirë gazetën Courrier Picard, 50-vjeçari ra nga një lartësi prej rreth shtatë metrash, duke përfunduar në oborrin e brendshëm të ndërtesës. Pavarësisht mbërritjes së shërbimeve të emergjencës, ndërhyrja e tyre nuk mundi t’i shpëtonte jetën.
Autoritetet franceze kanë nisur një hetim për veprën penale të vrasjes nga pakujdesia, konfirmoi Nicolas Septe, prokurori i Republikës në Beauvais. Për të përcaktuar shkaqet e sakta të vdekjes, pritet të kryhet edhe autopsia e viktimës.
Ndërkohë, në vendngjarje është kërkuar ndërhyrja e Inspektoratit të Punës, i cili do të shqyrtojë kushtet në të cilat po kryheshin punimet, veçanërisht respektimin e masave të sigurisë dhe përdorimin e pajisjeve mbrojtëse. Vlerësimi teknik pritet të ndihmojë në përcaktimin nëse janë shkelur rregullat e sigurisë në punë.
Sipas mediave franceze, pronarja e banesës kishte kryer paraprakisht deklarimin e punimeve dhe, për sa i përket këtij aspekti administrativ, nuk ishte konstatuar ndonjë problem.
Hetimet pritet të hedhin dritë mbi shkaqet e ngjarjes dhe nëse janë respektuar të gjitha masat e nevojshme për mbrojtjen e punëtorit.
