Dita Ndërkombëtare e Punëtorëve 1 Maji, këtë vit i gjen punonjësit shqiptarë më të ekspozuar ndaj rrezikut dhe pasigurisë se kurrë më parë.
Një video e mbërritur në redaksinë tonë nga qyteti i Lezhës, ilustron qartë këtë realitet: një punonjëse e hotelit “Sikladi” shihet duke pastruar xhamat e katit të tretë të ndërtesës, ndërsa ndodhet në pjesën e jashtme të dritares pa asnjë masë sigurie. Pamjet kanë shkaktuar reagime dhe shqetësim tek qytetarët, sidomos për faktin se kjo ndodh pikërisht në një ditë simbolike që i kushtohet mbrojtjes së të drejtave të punëtorëve.
Ndërsa rreziku individual mbetet i lartë, edhe statistikat janë alarmante: gjatë vitit 2024, 33 persona humbën jetën në vendin e punës, shifra më e lartë që nga viti 2020. Vetëm në tre muajt e parë të vitit 2025 janë regjistruar 54 aksidente në punë, me 8 viktima.
Dy janë arsyet kryesore të këtij bilanci të rëndë: mungesa e kontrolleve nga institucionet përgjegjëse dhe moszbatimi i masave të sigurisë nga vetë punonjësit dhe punëdhënësit.
Një tjetër tregues i rëndësishëm është edhe numri i orëve të punës. Sipas të dhënave të Eurostat, Shqipëria renditet si vendi me më shumë orë pune në javë në të gjithë Evropën, me një mesatare prej 43.7 orësh, afro 8 orë më shumë se mesatarja e vendeve të BE-së.
Në një ditë që duhet të shërbejë si kujtesë për dinjitetin dhe të drejtat e punëtorëve, realiteti në terren flet për mungesë të theksuar mbrojtjeje dhe kujdesi ndaj jetës së tyre.
<iframe src=”https://www.facebook.com/plugins/video.php?height=476&href=https%3A%2F%2Fwww.facebook.com%2Fjoqalbania%2Fvideos%2F1225998092214880%2F&show_text=false&width=267&t=0″ width=”267″ height=”476″ style=”border:none;overflow:hidden” scrolling=”no” frameborder=”0″ allowfullscreen=”true” allow=”autoplay; clipboard-write; encrypted-media; picture-in-picture; web-share” allowFullScreen=”true”></iframe>
