Dy persona janë arrestuar në Peshkopi pasi janë konfliktuar me dy efektivë policie, pas orarit të shërbimit. Robert Tota 22 vjeç dhe Klodjan Tota, 24 vjeç, vëllezër me njëri-tjetrin qëlluan dy efektivët dhe kundërshtuan edhe patrullën e policisë që ndërhyri për të shuar sherrin.
NJOFTIMI I POLICISË:
Nga specialistët për Hetimin e Krimit në Komisariatin e Policisë Dibër u bë arrestimi vëllezërve me iniciale R.T, 22 vjeç dhe K.T, 24 vjeç, banues në Dibër, pasi në qytetin e Peshkopisë janë konfliktuar për motive të dobëta me dy punonjës policie jashtë detyrës, duke u shkaktuar dëmtime të lehta truprore.
Menjëherë kanë ndërhyrë shërbimet e Patrullës për shoqërimim në Komisariat të dy vëllezërve, të cilët i kanë kundërshtuar punonjësit e patrullës duke i penguar në kryerjen e detyrave të tyre.
Dosja i shkoi Prokurorisë së Rrethit Gjyqësor Dibër, për veprat penale “Plagosja e lehtë me dashje”, kryer në bashkëpunim dhe “Kundërshtimi i punonjësit të policisë së rendit publik”.