Në librin e historisë së klasës së katërt, nxënësve u jepet përkufizimi i fshatit.Dhe ky term është shpjeguar duke u përshkruar kompleksi“Rolling Hills”, një nga ‘fshatrat’ në periferi të Tiranës e ndërtuar me vila luksoze të Saimir Manes. Pas kësaj ka ardhur edhe reagimi I gazetarit Kastriot Myftaraj i cili tregon të vërtetën e rezidencës së pasanikëve, teksa shprehet se banorrët e këtij ‘fshati’ nuk i bëri qytetarë pasuria.
Kastriot Myftaraj:
E vërteta e madhe e Rolling Hills si fshati i ri i fshatarëve të pasur që nuk u bënë dot qytetarë
Në të vërtetë nuk është as gënjeshtër, as skandal ajo që ka bërë qeveria duke futur në librat shkollore lagjen e pasur rezidenciale Rolling Hills në periferi të Tiranës si shembull i fshatit të mirërregulluar shqiptar. Është një e vërtetë e madhe e tranzicionit shqiptar.
Ndonëse Rolling Hillsi në kuptimin e infrastrukturës urbane duket një lagje e zhvilluar qyteti, në kuptimin sociologjik nuk është gjë tjetër veçse një fshat luksoz. Një neofshat i krijuar gjatë tranzicionit shqiptar nga të pasurit e rinj, të cilët në rastin më të mirë janë brezi i parë i të lindurve në qytet nga një familje fshatare që u rikthyen të jetojnë në fshatin e ri të përshtatur me kohën. Instinktet e tyre shoqërore janë fshatare prandaj ndjehen mirë atje. Në të vërtetë kanë mbetur pezull diku mes fshatarit dhe qytetarit.
Pasuria nuk i bëri dot qytetarë. Mendësia nuk i la të shkëputen nga fshatari. Dikur Italianët e quajtën Tiranën fshatin e vetëm në botë me një bulevard të madh në mes. Bulevardin në fakt e kishin ndërtuar vetë italianët. Sot Rolling Hillsi mund të jetë ndoshta fshati më kontrovers në botë, sa i përket ndryshimit mes nivelit të lartë të pasurisë dhe nivelit të ulët të mendësisë qytetare.
Emri është domethënës. Dikur Enver Hoxha lëshoi parullën mobilizuese: “T’ u qepemi kodrave dhe maleve, t’ i bëjmë ato pjellore si fushat!” Domethënë edhe banorët e fushave duhet të shkonin nëpër kodra dhe male. Sot të pasurit në Shqipëri iu qepen kodrave për të bërë në to fshatra luksoze. Nuk është tregues qytetërimi por neofshatarizimi.
