“Gjatë mandatit të ardhshëm, do të sigurojmë 24 orë ujë të pijshëm”. Ky është refreni që dëgjojnë qytetarët çdo dy vite, kur 1 muaj para zgjedhjeve vendore e 1 muaj para atyre qëndrore.
Premtimet e politikës në mbi 30 vite demokraci, vijon të jetë uji 24 orë, që në vendet e rajonit ka vite e vite që është zgjidhur.
Por sikur mos mjaftojë që në çezmat e qytetarëve nuk ka ujë nëse s’do të kishte depozita, qeveria tashmë ka dalë me një filozofi të re: të jap ujin me PPP.
Ministria e Infrastrukturës dhe Energjisë ka prezantuar te konsultimet publike projektligjin “Për sektorin e furnizimit me ujë të pijshëm, largimit, grumbullimit dhe trajtimit të ujërave të ndotura urbane”, ku një nga alternativat është pikërisht dhënia e shërbimit me koncesion.
Me pretendimin se pushteti vendor do të bashkëpunojë me qëndrorin për furnizimin me ujë dhe grumbullimin, largimin dhe trajtimin e ujërave të ndotura urbane, qytetarëve shqiptarë pritet që t’iu ngarkohet në kurriz një tjetër taksë.
Pjesa më e madhe e ujësjellësve në vend kanë një performancë negative financiare. Ato rezultojnë me humbje, teksa kanë detyrime të larta ndaj institucioneve të tjera, kryesisht për faturat e energjisë. Si rrjedhojë qeveria pretendon që të bëjë rioragizimin e tyre, por me paratë e qytetarëve.
Për të mbuluar paaftësinë e vet, shteti iu vë mbi supe shqiptarëve një tjetër barrë të rëndë, përveç gjithë atyre taksave që ka menduar të shtojë, qoftë kjo e pronës, sigurimi i banesës me detyrim e shumë të tjera.
