Kryeministri Edi Rama duket se është fiksuar me serialin “Gangs of London”, i cili ka në qendër një varg bandash kriminale, mes tyre edhe shqiptare.
Rama ka shfaqur publikisht pëlqimin e tij për këtë serial, teksa ka replikuar në një postim të një prej aktorëve shqiptarë pjesë e filmit, Orli Shuke, i cili është bërë i njohur edhe ndërkombëtarisht në rolin e tij krah Brad Pitt në War Machine (2017), dhe Hyena (2014).
“Sa e mbarova, super, përgëzime,”, shkruan Rama në një prej postimeve te aktorit shqiptar.
“Flm z.kryeministër. Shpresoj t’u ketë pëlqyer gangs,”ia kthen aktori kryeministrit, i cili nuk mjaftohet me një koment, por lë edhe një tjetër për të treguar se sa shumë i ka pëlqyer ky serial.
“Jo më pëlqeu, po më la lidhur dy netë deri kur u zgjuan tërë gjelat e Surrelit. Realisht super dhe më ke bërë krenar. Dhe të lutem falenderoje Pipën nga unë që më pëlqeu komentin. E kam admiruar që nga filmi “MotherFatherSon”, dhe jam mahnitur nga tranformimi në Gangs. Shendet e sukses te metejshem megjithe zemer i dashur Orli dhe të lutem mbijetoi sezonit 2,” shkruan Rama.
/