Përfaqësuesit e Dëshmitarëve të Jehovait kanë mohuar që nënë e bijë të gjetura të vdekura në një apartament në Tiranë i përkisnin fesë së tyre.
Sëbashku me dy viktimat, Zhaneta Josifi, 56 vjeç dhe vajza Anisa Josifi 30 vjeç, në gjendje të rëndë u gjet edhe vajza tjetër e familjes, Blerta Josifi, e cila tashmë është duke marrë trajtim mjekësor.
Mediat greke raportojnë se sipas shërbimit mjekoligjor, 30-vjeçarja, Anisa Josifi, studente në universitet, kishte vdekur të paktën 15 muaj, para se të konstatohej ngjarja e rëndë dhe nëna dhe motra e mbanin të mbuluar në krevat, duke pritur “ringjalljen” e saj.
Që në fillim, u përfol për vetëflijimin e dëshmitareve të Jehovait, por organizatat e tyre në Tiranë dhe Athinë mohuan që gratë kishin ndonjë lidhje me bashkësinë e tyre.
“Ne duam t’ju informojmë zyrtarisht se asnjëra prej dy grave që kanë kryer vetëvrasje nuk i përkisnin bashkësisë sonë fetare dhe as nuk kishin ndonjë lidhje me të. Mbi të gjitha, vetëvrasja nuk është për asnjë arsye e justifikuar nga feja e Dëshmitarëve të Jehovait.
Mësimet e Biblës bazohen në respektin më të madh të jetës njerëzore dhe askund quhet vetëvrasja, si diçka e bekuar nga Zoti. Është bindja jonë e thellë që Perëndia kurrë nuk do t’i kërkonte askujt që t’i japë fund jetës së tij, sepse jeta është e shenjtë për të!” – thuhet në një deklaratë nga komuniteti Grek i Dëshmitarëve të Jehovait.
Burimi: Panorama | /GazetaAtdheu.com/
