Rinumërimi i votave në Tiranë zbulon parregullsi, PS dhe PD humbasin më shumë se 100 vota secila
Procesi i rinumërimit të votave në Tiranë, i zhvilluar në ambientet e pallatit të sportit “Farije Hoti”, vazhdon mes polemikave dhe dyshimeve për parregullsi në numërimin fillestar. Pas përfundimit të rinumërimit për zonën e Paskuqanit, vëmendja tani është zhvendosur tek votat e Kasharit.
Sipas burimeve në terren, nga analizat paraprake rezulton se të dy partitë kryesore, Partia Socialiste dhe koalicioni Partia Demokratike – Aleanca për Shqipërinë Madhështore, kanë përfituar gabimisht vota shtesë në fazën e parë të numërimit.
Në përllogaritjet përfundimtare të bëra deri tani, Partia Demokratike ka rezultuar me 113 vota më shumë sesa realiteti, ndërsa Partia Socialiste me 110 vota të pavlefshme që u janë hequr pas verifikimit të dytë. Këto diferenca hedhin hije dyshimi mbi saktësinë dhe integritetin e procesit zgjedhor të 11 majit.
Të gjitha fletët e kontestuara, për të cilat ekziston debat mbi vlefshmërinë, janë dërguar për shqyrtim në Komisionin e Ankesave dhe Sanksioneve (KAS). Pikërisht ky institucion merr vendimin përfundimtar mbi pranueshmërinë ose jo të votave të diskutueshme.
Ndërkohë, përfaqësuesit e forcave politike kanë qëndruar të pranishëm gjatë procesit të rinumërimit, duke ndjekur me kujdes çdo hap dhe duke shfaqur hapur shqetësimet për mungesën e standardeve të garantuara.
Kritikat nuk kanë munguar as për trajtimin e fletëve të pavlefshme, të cilat në disa raste janë konsideruar të vlefshme në mënyrë të dyshimtë gjatë numërimit të parë. Ky fakt ka detyruar autoritetet të thellojnë kontrollin në çdo kuti.
Rinumërimi i plotë për qarkun e Tiranës pritet të vijojë edhe në ditët në vijim, ndërsa tensioni politik mbetet i lartë. Në pritje të vendimeve përfundimtare nga KAS-i, mbetet e paqartë nëse ky proces do të ndikojë ndjeshëm në rezultatin final të shpallur më herët.
