Kina po përballet me një rritje të rasteve të Covid-19 gjatë verës, me rreth 79 mijë infektime të regjistruara në muajin korrik, sipas Qendrës Kineze për Kontrollin dhe Parandalimin e Sëmundjeve (CDC). Nga këto, 130 pacientë ndodhen në gjendje të rëndë, megjithatë autoritetet shëndetësore theksojnë se situata mbetet nën kontroll dhe se shumica e rasteve paraqesin simptoma të lehta.
Varianti dominues në vend është Omicron NB.1.8.1, i cili sipas CDC-së ka një nivel të moderuar transmetimi. Gjatë javës 13–19 korrik, shkalla e testeve pozitive për Covid-19 arriti në 16.3%, duke tejkaluar edhe gripin si shkaktari kryesor i infeksioneve respiratore. Ekspertët besojnë se temperaturat e larta dhe qëndrimi më i gjatë në ambiente me ajër të kondicionuar kanë favorizuar përhapjen e virusit.
Autoritetet u bëjnë thirrje të moshuarve dhe personave me sëmundje kronike të tregojnë kujdes, duke përdorur maska në ambiente publike dhe duke u vaksinuar sipas rekomandimeve. Ndërkohë, Organizata Botërore e Shëndetësisë e ka klasifikuar variantin NB.1.8.1 si një “variant nën monitorim”, duke theksuar se ai përhapet më lehtë, por nuk ka prova se shkakton forma më të rënda të sëmundjes.
