Tregjet botërore reagojnë me optimizëm ndaj armëpushimit mes Izraelit dhe Iranit, ndërsa dollari bie dhe çmimet e naftës prekin nivelet më të ulëta të javës
Tregjet financiare reaguan pozitivisht këtë të martë, pasi një marrëveshje armëpushimi mes Iranit dhe Izraelit hyri në fuqi, duke ndalur një konflikt që kishte zgjatur 12 ditë. Rritja e aksioneve globale dhe rënia e dollarit amerikan pasqyruan pritshmëritë e investitorëve për një stabilitet më të madh në Lindjen e Mesme.
Sipas agjencisë Reuters, çmimet e naftës ranë në nivelin më të ulët të dy javëve të fundit, pas uljes së frikës për ndërprerje të mundshme të furnizimeve me energji nga rajoni i trazuar. Ky zhvillim u shoqërua me një optimizëm të dukshëm në tregjet ndërkombëtare.
Presidenti amerikan Donald Trump konfirmoi të hënën në mbrëmje se dy palët kishin arritur një marrëveshje armëpushimi. Ai deklaroi më vonë se marrëveshja kishte hyrë zyrtarisht në fuqi dhe u bëri thirrje Iranit dhe Izraelit të shmangnin çdo veprim që mund ta shkelte atë.
Megjithatë, tensionet nuk u zhdukën plotësisht. Shefi i shtabit të përgjithshëm të Forcave të Mbrojtjes së Izraelit, Eyal Zamir, paralajmëroi se ushtria izraelite do të reagojë me vendosmëri ndaj asaj që e cilësoi si “shkelje të rëndë” nga ana e Iranit. Në një deklaratë në rrjetin social X, ai u shpreh se ushtria izraelite është e gatshme të përgjigjet fuqishëm nëse marrëveshja cenohet.
Pak orë pas hyrjes në fuqi të armëpushimit, Izraeli njoftoi se kishte identifikuar lëshime raketash që sipas tyre vinin nga Irani. Nga ana tjetër, mediat shtetërore iraniane hodhën poshtë pretendimet, duke mohuar çdo përfshirje në ndonjë sulm pas nisjes së marrëveshjes.
Zhvillimet mbeten të brishta, por armëpushimi shihet si një hap i rëndësishëm drejt uljes së tensioneve, të cilat kishin ngritur në nivel të lartë shqetësimet ndërkombëtare për një përshkallëzim më të gjerë ushtarak. I vetmi që humb është dollari, por zhvillimet e mëtejshme do të përcaktojnë edhe ecurinë e tregjeve.
