Një qytetar ka denoncuar në redaksinë tonë një problem që, sipas tij, përsëritet çdo ditë pranë kompleksit Kadiu në zonën e Ali Demit, Tiranë.
Ai ka treguar se automjetet e parkuara në mes të rrugës dhe në korsinë e emergjencës vështirësojnë kalimin e banorëve me karroca, ndërsa rruga përdoret edhe si akses për banorët e pallateve.
Qytetari shprehet se situata krijon vështirësi veçanërisht për këmbësorët dhe prindërit me karroca fëmijësh. Ai thotë gjithashtu se, pavarësisht telefonatave, policia nuk ka ndërhyrë dhe banorëve u është thënë që për problemin të kontaktojnë Bashkinë.
“Mirëmëngjes JOQ, kjo punë është çdo ditë te pallatet Kadiu në Ali Dem. Bllokojnë rrugën e këmbësorëve dhe na vështirësojnë kalimin me karroca. Policinë e marrim, por nuk vjen. Na thonë të marrim Bashkinë”, shkruan qytetari.
Banorët kërkojnë ndërhyrje për lirimin e hapësirave të bllokuara dhe marrjen e masave ndaj parkimeve që pengojnë qarkullimin.
