Një tjetër çift që ka funksionuar brenda sistemit të drejtësisë, është Margarita Buhali, gjyqtare dhe bashkëshorti i saj oficer i policisë gjyqësore Gertmond Koroveshi. Ky i fundit është kapur duke marrë rryshfet gjatë ushtrimit të detyrës së tij.
Gjyqtarja e Gjykatës së Apelit të Vlorës, Margarita Buhali, u përball më 17 qershor 2019 me Komisionin e Pavarur të Kualifikimit. Margarita Buhali ka mbaruar Shkollën e Magjistraturës në vitin 2002 dhe është emëruar gjyqtare në Gjykatën e Beratit. Ajo u zgjodh përmes shortit elektronik anëtare e Këshillit të Emërimeve në Drejtësi për vitin 2019.
Margarita Buhalit nuk i janë gjetur probleme të pasurisë, profesionalizmit apo pastërtisë së figurës. Por bashkëshorti i gjyqtares Gertmond Koroveshi është denoncur si i përfshirë në një aferë korruptive.
Buhali është justifikuar se ka mbajtur qëndrim ndaj bashkëshortit. Ajo është distancuar duke u divorcuar prej tij. Megjithatë ajo është shprehur se bashkëshorti i saj nuk mund të konsiderohej si “kontakt i papërshtatshëm” pa pasur ndaj tij një vendim gjykate.
