Seanca paraprake në GJKKO për çështjen në ngarkim të kryebashkiakut të Tiranës, Erion Veliaj, është shtyrë pasi avokatët mbrojtës kërkuan kohë shtesë për t’u njohur plotësisht me aktet e dosjes. Sipas tyre, edhe vetë Veliaj duhet të njihet personalisht me materialet hetimore dhe ato duhet t’i dorëzohen në qeli.
Kërkesa u kundërshtua nga prokurori i SPAK, i cili deklaroi se mbrojtja është njohur më herët me aktet dhe se Veliaj ka kërkuar të gjykohet, por nuk paraqitet në seancë.
Gjatë procesit, është bërë gjithashtu publike edhe kërkesa e Veliajt për të pasur një laptop në qeli, me arsyetimin se i nevojitet për të lexuar dokumentet e dosjes.
Kryebashkiaku i Tiranës përballet me akuza për pastrim parash, mosdeklarim pasurie, korrupsion pasiv në 9 episode, shpërdorim detyre dhe futje të sendeve të ndaluara në qeli. Në të njëjtën dosje janë të përfshira edhe bashkëshortja e tij, Ajola Xoxa, e akuzuar për mosdeklarim pasurie, fshehje të të ardhurave dhe pastrim parash, si dhe ish-deputetja Klotilda Bushka, e cila akuzohet për veprime që pengojnë zbulimin e së vërtetës.
Kujtojmë se më 3 nëntor, Gjykata Kushtetuese vendosi në favor të Veliajt, duke e lënë atë në detyrë dhe duke rrëzuar vendimin e qeverisë për shkarkimin, si dhe shfuqizuar dekretin e Presidentit Bajram Begaj për shpalljen e zgjedhjeve të pjesshme në Tiranë.
