Një shtetas serb, Tomislav Lulzim Perusiç i ka bërë thirrje shtetit të Serbisë që t’i kërkojnë falje Kosovës, dhe e cilësoi si të papranueshme sjelljen në kufi.
Perusiç e ka kthyer Prishtinën në shtëpinë e tij të dytë.
Ai tha se i ka ndjekur më vëmendje zhvillimet e këtyre ditëve në veriun e Kosovës, dhe është acaruar nga ajo që bënë serbët. “U nervozova kur pashë protestat në kufi, mënyra sesi shajnë dhe përdorin një fjalor shumë primitive. Nuk e mbështes atë veprim. Me sjelljen e qeverisë serbe, mund të them se kemi shumë shkelje të të drejtave të qytetarëve te Kosovës”, është shprehur ai ndërsa prek idenë e reciprocitetit.
Sipas të riut, Serbia duhet t`i kërkojë falje Kosovës. “Nuk mund të vazhdohet kështu, me të kaluarën, duhet zbardhur çështja e të pagjeturve dhe besoj se Serbia ka edhe përgjegjësi t’i shpërbleje familjet e viktimave të luftës”, shton ai ndërsa thotë se që të arrihet një marrëveshje dy shteteve, nuk duhet ndihma e Amerikës apo dikujt tjetër.
