Një skenë kaotike është regjistruar në tribunat e stadiumit gjatë sfidës çerekfinale të Kupës së Botës 2026 mes Anglisë dhe Norvegjisë. Disa tifozë të veshur me fanella të Argjentinës janë përfshirë në një përleshje fizike me një tjetër tifoz, ndërsa pamjet e incidentit janë shpërndarë me shpejtësi në rrjetet sociale.
Në videot e publikuara online shihen disa persona që shtyhen dhe goditen mes tyre, ndërsa tifozë të tjerë përpiqen të ndërhyjnë për të ndalur konfliktin. Situata u qetësua vetëm pas ndërhyrjes së sigurisë së stadiumit.
Ende mbetet e paqartë se çfarë e shkaktoi përplasjen, ndërsa incidenti ka nxitur reagime të shumta nga tifozët në internet.
Përfshirja e personave me fanella të Argjentinës ka tërhequr vëmendje të veçantë, pasi përplasja ndodhi gjatë një ndeshjeje ku nuk ishte në fushë kombëtarja argjentinase. Megjithatë, deri tani nuk ka një shpjegim zyrtar mbi arsyen e konfliktit.
Pavarësisht tensioneve në shkallët e stadiumit, ndeshja vijoi pa ndërprerje. Anglia mposhti Norvegjinë me rezultatin 2-1 dhe siguroi një vend në gjysmëfinalet e Kupës së Botës 2026, me Jude Bellingham që ishte heroi i takimit pas dy golave të shënuar.
