Prej më shumë se dy javësh Veziko Bojko është larguar nga banesa dhe nuk është kthyer më. Familjarët bëjnë me dije se 45-vjeçarja ishte larguar si normalisht në mal për të mbledhur dru për zjarr. Burri dhe djali i saj, të dy barinj në fshatin Tërbaç të Vlorës, tregojnë se e njohin zonën me pëllëmbë por i habit fakti se nuk ka asnjë gjurmë nga familjarja e tyre.
“Do dal të mbledh një palë shkarpa dhe do kthehem, dale moj të hamë bukë i thash, jo më tha se nuk vonohem. Nuk ishte e mërzitur kur doli nga shtëpia, pimë dhe kafe të tre” – thotë i biri i Veziko Bojkos.
Kërkimet për 45-vjeçaren kanë vijuar çdo ditë jo vetëm nga babë e bir por edhe nga ekipet e policisë dhe zjarrfikësit. I habitshëm mbetet fakti se nuk ka asnjë gjurmë të saj, pasi zonën e fshatit familjarët e njohin. Me shpresën se Veziko Bojko do të gjendet, i biri dhe burri vijojnë të shpresojnë për të duke kërkuar ku të munden.