Një shpërthim i fuqishëm me lëndë plasëse, që dyshohet të jetë tritol, ka ndodhur rreth orës 04:00 të mëngjesit të sotëm në një lokal në Vlorë. Si pasojë e shpërthimit janë shkaktuar dëme të mëdha materiale në ambientet e biznesit, si edhe në një automjet të parkuar pranë, ndërsa nuk raportohet për persona të lënduar.
Menjëherë pas ngjarjes, në vendngjarje kanë mbërritur shërbimet e Policisë dhe grupi i ekspertizës kriminalistike, të cilët kanë nisur hetimet për të dokumentuar ngjarjen dhe për të mbledhur provat. Zona është rrethuar për të lehtësuar punën e hetuesve.
Autoritetet po punojnë për të zbardhur rrethanat e plota të shpërthimit, si dhe për të identifikuar autorët dhe motivet e mundshme të këtij akti. Deri në përfundim të hetimeve, policia nuk ka dhënë detaje të tjera zyrtare mbi ngjarjen.
