Vetëm 17 kilometra larg qytetit të Lezhës, rreth 5,000 banorë të zonës së Torovicës dhe fshatrave përreth vazhdojnë të përballen me një nga absurditetet më të mëdha të infrastrukturës publike, duke jetuar prej dy dekadash pa një furnizim normal me energji elektrike.
Ndonëse në terren janë instaluar shtylla të reja dhe janë shtrirë tela të rinj, mungesa e dritave dhe ndërprerjet e vazhdueshme mbeten një plagë e hapur dhe e pazgjidhur për këtë komunitet.Banorët shprehen të indinjuar se situata ka mbetur e pandryshuar për plot 20 vjet, kohë gjatë së cilës premtimet dhe ndërhyrjet sipërfaqësore nuk janë përkthyer kurrë në normalitet për familjet e zonës.
Ndërprerjet e shpeshta dhe mungesa e vazhdueshme e energjisë jo vetëm që vështirësojnë jetesën e përditshme të mijëra qytetarëve që ndodhen kaq pranë qendrës së qarkut, por dëshmojnë edhe një herë diferencimin dhe neglizhencën ndaj zonave rurale.
Përmes këtij denoncimi, banorët kërkojnë ndërhyrjen e menjëhershme të institucioneve dhe shpërndarjen e këtij shqetësimi jetik, me shpresën se më në fund zëri i tyre do të dëgjohet për t’i dhënë fund këtij izolimi energjetik që rëndon mbi ta prej njëzet vitesh.
