Tenderat vijojnë të jenë një instrument përfitimi ekonomik për kryetarët e institucioneve publike në vend, të cilët lidhin kontrata me çmime të fryra për përfitime personale dhe duke dëmtuar interesin publik.
E radhës është Bashkia e Elbasanit, e drejtuar nga Gledian Llatja, që ka shpallur së fundmi fituesin e tenderit me objekt “blerje buke integrale”.
Tender pa garë
Në këtë rast, Bashkia e Elbasanit ka lidhur një tender që klasifikohet me “flamur të kuq”.
Kjo, pasi jemi në kushtet e mungesës së konkurrencës dhe kompania e vetme që ka marrë pjesë në tender – “Flamur Asllani” – është shpallur fituese.
Rast ky, ku rreziku për korrupsion nga autoriteti kontraktues dhe firma fituese vlerësohet i lartë.
Kontrata me çmime më të larta se tregu
Oferta limit për këtë tender ka qenë 2,833,217 Lekë të reja, ndërsa firma e vetme pjesëmarrëse në tender dhe e shpallur fituese, ka bërë një ofertë ekonomike prej 2,821,262 (dy milion e tetëqind e njëzet e njëmijë e dyqind e gjashtëdhjetë e dy) Lekë pa TVSH.
Për vlerën prej rreth 28 milionë Lekë, firma fituese – nën pronësi të Flamur Asllanit, sipas të dhënave në Qendrën Kombëtare të Biznesit, do të furnizojë bashkinë me 23.909 bukë integrale, 1 kg/copa.
Gjerësisht, një qytetar ble një bukë të tillë me 80 lekë në një furrë.
Por, sipas kontratës që ka lidhur Bashkia e Elbasanit me “Flamur Asllanin”, rezulton se firma fituese do ti shesë bashkisë bukë me çmim më të lartë se ai i shitjes me pakicë.
Më konkretisht, Bashkia e Elbasanit do të blejë një buke me 118 Lekë.
/Gazetaatdheu.com/
