Kjo fundjavë ka nisur me heqjen e disa kufizimeve të tjera nga Ministria e Shëndetësisë për kategori të caktuara, shtimin e orëve të qarkullimit të këmbësorëve dhe të mbajtjes hapur të dyqaneve.
Pensionistët janë lejuar të dalin sot për më gjatë, deri në orën 10:00 dhe pas kësaj ore, për herë të parë, janë lejuar edhe baballarët të dalin me fëmijët e tyre.
Sipas udhëzimeve të reja, të shtunën 2 maj dhe të dielën 3 maj, pensionistët do të lejohen të dalin lirisht deri në orën 10.00. Të tjerët jo në këtë fashë orare.
Të shtunën 2 maj dhe të dielën 3 maj, prindërit me fëmijët deri në 14 vjeç do të lejohen të dalin lirisht nga ora 11.00 deri në orën 17.30.
Të shtunën 2 maj do të qëndrojnë hapur vetëm furrat e bukës, ushqimoret dhe farmacitë deri në orën 17.30.
Të dielën do të jenë të gjitha mbyllur.
Gjatë të shtunës 2 maj dhe të dielës 3 maj do të ndalohet kategorikisht qarkullimi i automjeteve private (përjashtuar ata që punojnë me autorizimet përkatëse).
