Gjykata e Posaçme Kundër Korrupsionit dhe Krimit të Organizuar (GJKKO) i ka dhënë fund pas dy vitesh një prej dosjeve të bujshme të abuzimeve me tenderat, duke pastruar plotësisht figurën e ish-kreut të Komisionit të Prokurimit Publik (KPP), Jonaid Myzyri. Përmes një vendimi të marrë nga gjyqtari Paulin Çera, gjykata ka pranuar kërkesën e Prokurorisë së Posaçme (SPAK) për të pushuar procedimin penal ndaj Myzyrit, pasi nga hetimet disavjeçare nuk u provua konsumimi i asnjë vepre penale.
Ish-kreu i KPP-së ishte vënë në shënjestër të SPAK-ut për dyshimet e “shkeljes së barazisë së pjesëmarrësve në tendera apo ankande publike”, në lidhje me një procedurë prokurimi me vlerë të majme prej rreth 2.2 milionë eurosh, që kishte si objekt mirëmbajtjen e disa segmenteve rrugore të rëndësishme në vend. Megjithatë, pas dritës jeshile që GJKKO dha më herët duke akorduar një afat shtesë prej 45 ditësh për kryerjen e një akt-ekspertimi të thelluar nga ekspertë të licencuar, të gjitha aludimet ranë poshtë. Akt-ekspertimi konfirmoi se procedurat ishin ligjore, duke detyruar prokurorin e SPAK, Elvin Gokaj, që të kërkonte zyrtarisht mbylljen e dosjes.
Bashkë me ish-kreun e KPP-së, ky vendim lirie dhe drejtësie ka shpëtuar edhe katër ish-zyrtare të tjera të përfshira në këtë procedurë. Gjykata ka vendosur të pushojë akuzat gjithashtu për shtetaset Vilma Zhupaj, Lindita Skeja, Merita Zeqaj dhe Enkeleda Bega. Me këtë hap, epopesë dyvjeçare të hetimeve të SPAK mbi tenderin 2.2 milionë eurosh i vendoset kapaku, duke rrëzuar çdo dyshim që peshonte mbi ish-zyrtarët e lartë.
