Spanja u shpall kampione e botës, duke fituar titullin e dytë në historinë e saj dhe të parin që nga triumfi i vitit 2010 në Afrikën e Jugut. Megjithatë, festimet e “La Roja”-s u shoqëruan edhe me një incident të tensionuar menjëherë pas përfundimit të finales.
Pamjet që u përhapën me shpejtësi në rrjetet sociale treguan një përplasje verbale mes mesfushorit spanjoll Gavi dhe argjentinasit Leandro Paredes. Edhe pse Gavi nuk u aktivizua në finale, ai u përfshi në festimet e skuadrës së tij, ndërsa reagimi i ashpër i Paredesit tërhoqi menjëherë vëmendjen.
Në momentin kur arbitri sinjalizoi fundin e ndeshjes, lojtarët spanjollë u mblodhën në qendër të fushës për të festuar suksesin historik. Pikërisht atëherë kamerat fokusuan trajnerin e Argjentinës, Lionel Scaloni, i cili vrapoi me shpejtësi drejt një grupi lojtarësh, në një përpjekje për të qetësuar situatën.
Pak çaste më vonë u bë e qartë se tensionet kishin shpërthyer mes futbollistëve të të dyja skuadrave. Scaloni ndërhyri për të shmangur përshkallëzimin e konfliktit, në një atmosferë të ngarkuar nga gëzimi i spanjollëve dhe zhgënjimi i argjentinasve pas humbjes së finales.
Në qendër të debatit ishte Leandro Paredes, i cili u përfshi në një shkëmbim të ashpër fjalësh me disa lojtarë të Spanjës, mes tyre Gavi dhe Eric García. Ende nuk është konfirmuar zyrtarisht se çfarë u tha mes palëve, por incidenti errësoi për disa momente festën e kampionëve të rinj.
Sa i përket finales, Spanja siguroi fitoren 1-0 ndaj Argjentinës pas kohës shtesë. Goli vendimtar u realizua nga Ferran Torres në minutën e 106-të, duke vulosur triumfin e skuadrës së drejtuar nga Luis de la Fuente. Spanjollët përfituan edhe nga epërsia numerike pas kartonit të kuq të Enzo Fernández, ndërsa dominuan pjesën më të madhe të takimit dhe krijuan rastet më të rrezikshme deri te momenti i golit të fitores.
