Një operacion i Guardia Civil spanjolle, me mbështetjen e Drejtorisë Qendrore Italiane për Shërbimet Kundër Drogës, me mbështetjen e Europol ka çuar në arrestimin e 20 personave.
Europol njofton se të arrestuarit akuzohen për pastrim parash dhe trafik droge. Si rezultat i operacionit u sekuestruan më shumë se 5.5 milionë euro asete kriminale dhe mbi 2 ton drogë.
Me qendër në jug të Spanjës, rrjeti kriminal përbëhej nga shtetas shqiptarë, italianë, spanjollë dhe marokenë dhe drejtohej nga shtetas italianë që shmangnin kapjen duke përdorur dokumente të falsifikuara identiteti.
Kriminelët përdornin identitete të rreme
Duke qenë se drejtuesit italianë të rrjetit kriminal ishin subjekt i urdhrave evropianë të arrestit, ata përdorën dokumente të falsifikuara për të mbuluar identitetin e tyre.
Duke banuar në qytetet midis Seviljes dhe Malagës, ata u përpoqën të shmangnin zbulimin duke marrë masa të ndryshme sigurie dhe duke ndryshuar shpesh adresat e tyre.
Rrjeti kriminal përdori një sërë metodash të pastrimit të parave për të mos zbuluar të ardhurat e tyre nga trafiku i drogës. Këto përfshinin shpërndarjen e parave, përmes llogarive bankare të biznesit duke përdorur fatura false, kredi ose borxhe të tjera, midis një rrjeti kompanish të përfshira në transportin e drogës.
Metoda të tjera të përdorura ishin investimet në pasuri të paluajtshme luksoze, qira, mallra dhe automjete luksoze, si dhe pagesa me para në dorë.
Laboratori i drogës dhe plantacioni i marijuanës
Hetimet për këtë rast nisën në tetor të vitit 2021, kur një ngarkesë hashashi u gjet e fshehur në një kamion që transportonte paleta me qepë. Forcat e rendit arrestuan dy drejtuesit e mjeteve dhe sekuestruan 468 kilogramë hashash.
Kjo u pasua nga një tjetër sekuestrim i 194 kilogramëve hashash dhe 30 kilogramë marijuanë në maj të vitit 2022. Në të njëjtin muaj një varkë e marrë me qira nga organizata kriminale u kap nga forcat e rendit në det të hapur, duke rezultuar në arrestimin e tre pasagjerëve të saj, si dhe sekuestrimin e 1800 kilogramëve hashash dhe vetë mjetin lundrues.
Përgjimi i kësaj dërgese të madhe nga Maroku tregon se është bërë gjithnjë e më e vështirë për kriminelët që të importojnë drogë përmes detit.
Për të anashkaluar këtë çështje, organizata kishte ndërtuar një laborator për prodhimin e hashashit dhe kishte ngritur një plantacion të madh marijuane në Spanjën jugore. Këto u zbuluan gjatë operacionit, ku u përfshinë më shumë se 150 zyrtarë të zbatimit të ligjit.
