Një ngjarje e rëndë ka ndodhur më 10 qershor 2026 në Durrës, ku E.L., babai i dy fëmijëve, dyshohet se ka tentuar të vrasë ish-bashkëshorten e tij, Er… L., duke e goditur disa herë me thikë.
Ngjarja ka ndodhur rreth orës 03:00, në zonën e ish-Kënetës, ku gruaja jetonte me qira. Ajo mbeti e plagosur rëndë dhe u dërgua në Spitalin Ushtarak për mjekim.
E.L. u arrestua rreth një muaj pas ngjarjes. Gjykata e Durrësit ka caktuar ndaj tij masën “Arrest në burg”, për akuzën e “Vrasjes për shkak të marrëdhënieve familjare”, e mbetur në tentativë.
Çifti ishte divorcuar rreth një vit më parë dhe jetonte i ndarë. Dy fëmijët qëndronin me babain, ndërsa gruaja jetonte e vetme. Sipas hetimeve, konfliktet mes tyre ishin përshkallëzuar pas divorcit ndërsa burri e akuzonte pse ishte lidhur me shefin e saj.
Në dëshminë e tij, E.L. ka pranuar se e kishte goditur ish-gruan me thikën e bukës, ndërsa në gjykatë ka pretenduar se kishte konsumuar alkool dhe nuk e mbante mend qartë momentin e sulmit. Ai kërkoi “Arrest në shtëpi”, duke argumentuar se kujdesej për fëmijët.
Prokuroria kundërshtoi kërkesën dhe kërkoi burgosjen e tij, duke theksuar edhe faktin se E.L. rezultonte i dënuar më herët për “Dhunë në familje” ndaj ish-bashkëshortes.
Në dosjen hetimore ndodhet edhe dëshmia e gruas, e cila nga Spitali Ushtarak ka deklaruar se ish-bashkëshorti kishte qëndruar pranë banesës që prej orës 23:30 dhe rreth orës 03:00 kishte hyrë në banesë dhe e kishte sulmuar, duke i thënë se kishte shkuar për ta vrarë.
Dëshmia e saj u ndërpre për shkak të gjendjes së rënduar shëndetësore. Ndërkohë, edhe dy banorë të pallatit kanë dëshmuar se kishin dëgjuar thirrje për ndihmë dhe e kishin parë gruan të plagosur dhe të mbuluar me gjak.
Në përfundim, Gjykata e Durrësit ka vendosur “Arrest në burg” për E.L., i dyshuar për tentativë vrasjeje ndaj ish-bashkëshortes.
