Një student 19-vjeçar është rrëzuar nga parmaku i dritares në universitetin e Selanikut. I riu po ndiqte leksionin i ulur në parmakun e dritares pasi salla ishte mbushur plot me studentë dhe nuk kishte ku të ulej.
Në një moment ai u rrëzua nga kati i tretë i godinës së Fakultetit të Drejtësisë dhe ra në oborr. I riu u transportua menjëherë me ambulancë në Papanikolaou. Sipas mjekëve gjendja shëndetësore e 19-vjeçarit vlerësohet e qëndrueshme por ende nuk dihet shkaku i rrëzimit të tij.
Ai ka pësuar disa fraktura, ndërsa aktualisht po i nënshtrohet analizave për të përcaktuar shkallën e tyre.
Një student tregoi për mediat se auditori ishte tejmbushur dhe studentët ishin ulur në dysheme e disa të tjerë te parmaku i dritares.
