Të paktën tre persona vdiqën dhe nëntë të tjerë u plagosën pas stuhive të forta që goditën Turqinë këtë të hënë. Dy gra vdiqën në rrethet Esenyurt dhe Sultangazi të Stambollit, ndërsa një punëtor ndërtimi vdiq kur një mur që u shemb e zuri poshtë, ngjarje e ndodhur në provincën veriore të Zonguldak. Në disa provinca të Izmirit, Kocaelit dhe Bursës deti vërshoi dhe çatitë u hoqën nga majat e ndërtesave si pasojë e erërave të forta. Agjencia turke e motit lëshoi një paralajmërim për stuhi të nivelit portokalli për 17 provinca, i dyti më i larti nga katër nivelet e rrezikut dhe një alarm i verdhë, niveli i tretë më i lartë i rrezikut, për 35 provinca, raporton Daily Sabah.
Sipas Shërbimit Meteorologjik Shtetëror Turk (TSMS), më shumë shira të rrëmbyeshëm dhe stuhi janë të mundshme në rajonet Marmara, Egje, Mesdheun Perëndimor dhe Detin e Zi perëndimor dhe në veriperëndim të Anadollit qendror. Shi me baltë është vënë re në Stamboll në orët e mëngjesit për shkak të stuhisë. Shumë shoferë u dyndën në lavazhe për të pastruar makinat e tyre të mbuluara me baltë. Sipas TSMS, shpejtësia e erës arriti në 80.78 mph (129.95 km/h) në lagjen Beylikdüzü të Stambollit, 62.14 mph në lagjen Adalar në Ishujt e Princave dhe 49.71 mph rreth Bosforit.
