Parlamenti i Suedisë ka miratuar uljen e moshës minimale të përgjegjësisë penale në 14 vjeç për vepra veçanërisht të rënda, përfshirë vrasjen, përdhunimin e rënduar dhe krimet e rënda me armë. Vendimi u miratua me 281 vota pro dhe 66 kundër, ndërsa dy ligjvënës munguan në votim.
Qeveria dhe Demokratët e Suedisë kishin propozuar fillimisht uljen e moshës në 13 vjeç, por e tërhoqën këtë kërkesë për shkak të mungesës së mbështetjes së mjaftueshme në parlament. Lideri i Demokratëve të Suedisë, Jimmie Akesson, e përshëndeti vendimin, duke e cilësuar si “një hap në drejtimin e duhur”.
Gjatë seancës së jashtëzakonshme, parlamenti miratoi gjithashtu rregulla më të ashpra për emigracionin familjar dhe shfuqizoi uljen e dënimeve për personat e dënuar për disa vepra penale njëkohësisht. Sipas rregullave të reja, në përgjithësi kërkohen të paktën dy vite qëndrimi në Suedi përpara se një i afërm të mund të përfitojë leje qëndrimi përmes lidhjeve familjare.
