Zëdhënësit e Pentagonit deklaruan se operacioni ndaj Iranit ishte një sukses i jashtëzakonshëm që çoi në asgjësimin e programit bërthamor iranian.
Zyrtarët më të lartë të Shteteve të Bashkuara dolën sot në një konferencë për shtyp në Pentagon, për të dhënë detaje mbi sulmin e ndërmarrë ndaj objektivave kyçe bërthamore në territorin iranian. Ngjarja ndodhi të dielën në mëngjes, dhe sipas zëdhënësve, u përshkrua si një ndër operacionet më të suksesshme të viteve të fundit.
Sekretari amerikan i Mbrojtjes, Pete Hegseth, deklaroi se ushtria amerikane kishte ndërmarrë një sulm të mirëplanifikuar dhe preciz gjatë natës, duke goditur tre objekte të rëndësishme të programit bërthamor të Iranit. Ai theksoi se qëllimi i misionit ishte goditja e infrastrukturës strategjike që përbënte rrezik të drejtpërdrejtë për sigurinë ndërkombëtare.
Në deklaratën e tij, Hegseth nënvizoi: “Sulmi ishte një sukses i jashtëzakonshëm. Objektivat u neutralizuan plotësisht dhe programi bërthamor i Iranit u shkatërrua në masë të madhe. Ky është një hap vendimtar në garantimin e paqes dhe stabilitetit në rajon.”
Më tej Hegseth theksoi rëndësinë e operacionit duke thënë se “kur presidenti ynë flet, bota duhet të dëgjojë”. Të dy zyrtarët i qëndruan bindjes se Shtetet e Bashkuara nuk do të tolerojnë kërcënime bërthamore nga asnjë regjim.
Konferenca u mbyll me mesazhe të qarta se SHBA mbetet e vendosur të mbrojë sigurinë globale dhe do të veprojë pa hezitim ndaj çdo kërcënimi që rrezikon aleatët dhe stabilitetin ndërkombëtar.
Pentagoni nuk dha detaje të hollësishme për vendndodhjen e objekteve të goditura, por burime pranë ushtrisë konfirmojnë se sulmet u kryen me avionë të teknologjisë së avancuar, duke shmangur humbjet civile.
Me këtë veprim, Uashingtoni ka dhënë një sinjal të fortë ndaj Teheranit, ndërsa tensionet në Lindjen e Mesme vijojnë të mbeten të larta.
