Kushtet aspak të mira të jetesës dhe mundësia për të përparuar me planet tyre i detyron të rinjtë shqiptarë të largohen nga vendi. Këtë fakt e tregojnë edhe të dhënat më të fundit të Eurostat. Një raport i publikuar tregon se të rinjtë shqiptarë nuk kanë mundësi të sigurojnë të mirat materiale, që janë të nevojshme apo i dëshirojnë për një jetë më të mirë.
Sipas Eurostat arsyet që i nxisin ata të largohen nga vendi lidhen me pamundësinë për të përballuar pagesa të ndryshme si qiraja, huaja për shtëpi, pushime, blerjen e një makine, shpenzimin e kohës së lirë etj, me pak fjalë pamundësinë për të bërë një jetë të përshtatshme dhe të dëshirueshme.
Sipas statistikave të Eurostat, në Bashkimin Europian në vitin 2021, shkalla e privimit të rëndë material dhe social midis të rinjve (mosha 15-29 vjeç) ishte 6,1%.Për Shqipërinë, ky tregues është shumë më i lartë, në 34%, duke shënuar një rekord negativ në Europë.
Ndërsa në treguesin e privimit material, Shqipëria ka diferencë me vendet e rajonit, në indikatoritn tjetër, që mat rrezikun për të qenë i varfër, vendi ynë së bashku me Maqedoninë e Veriut, Malin e Zi dhe Serbinë, për të cilat raportohen të dhënat janë pothuajse në të njëjtin nivel, me rreth 25% të grupmoshës nga 15-29 vjeç që është në rrezikun për të qenë i varfër.