Stadiumi “Niko Dovana” i kalon Korporatës së Investimeve Shqiptare, ndërsa Teuta mbetet pa president dhe pa fushë zyrtare për ndeshje
Klubi i futbollit Teuta përjeton një prej krizave më të mëdha në historinë e tij, pasi mbetet zyrtarisht pa president dhe pa stadium. Vendimi më i fundit i Këshillit të Ministrave ka vulosur largimin e pronësisë mbi “Niko Dovanën”, duke ia kaluar këtë objekt strategjik Korporatës së Investimeve Shqiptare.
Sipas Fletores Zyrtare, VKM-ja zyrtarizon transferimin e të drejtave pronësore të stadiumit në favor të “Korporatës së Investimeve Shqiptare” sh.a., me qëllim realizimin e projektit të investimit për “Rijetëzimin e stadiumit ‘Niko Dovana’, Durrës”. Kjo do të thotë që stadiumi nuk do të jetë më në përdorim nga klubi vendas.
Vendimi hap rrugën për nisjen e menjëhershme të procedurave që synojnë rindërtimin e plotë të stadiumit dhe transformimin e zonës përreth, bazuar në një projekt të miratuar më parë nga autoritetet. Në pamje të parë, ky duket si një hap përpara për infrastrukturën sportive në qytetin bregdetar.
Megjithatë, për Teutën, ky zhvillim përbën një goditje të rëndë. Pas dorëheqjes së presidentit Edmond Hasanbelli, klubi nuk ka më një figurë drejtuese, ndërsa tani duhet të përballet edhe me mungesën e shtëpisë tradicionale ku zhvillonte ndeshjet.
Pasojë e drejtpërdrejtë e këtij vendimi është largimi i menjëhershëm i skuadrës nga “Niko Dovana”, gjë që e detyron ekipin të kërkojë një tjetër impiant për të luajtur ndeshjet në Superiore. Ky ndryshim i papritur e çon klubin në një rrugëtim të paqartë dhe të rrezikshëm.
Kjo situatë rëndon më tej vitin tranzitor që po kalon Teuta, një sezon i mbushur me pasiguri dhe performanca të dobëta. Largimi nga stadiumi, bashkë me boshllëkun në drejtim, mund të ndikojnë negativisht në moralin dhe paraqitjen e lojtarëve.
Tifozët durrsakë ndihen të zhgënjyer dhe të braktisur. Ata kanë parë skuadrën e zemrës të shembet ngadalë, fillimisht me tërheqjen e mbështetjes financiare dhe tani me humbjen e fushës që ka qenë simbol i lavdisë së klubit ndër vite.
Ndërkohë që qeveria thekson rëndësinë e investimeve në infrastrukturë, komuniteti sportiv i Durrësit kërkon garanci se klubi nuk do të braktiset dhe se do të ketë një plan të qartë për rikthimin e Teutës në terrenin e saj pas përfundimit të projektit.
Situata është në një pikë kritike dhe pritet që në ditët në vijim drejtuesit lokalë, bashkia dhe institucionet përkatëse të dalin me një zgjidhje të përkohshme për të mos lejuar shpërbërjen e një prej klubeve më emblemë të futbollit shqiptar.
