Një ngjarje tragjike është regjistruar në Korçë, ku një 62-vjeçar ka humbur jetën pasi u rrëzua aksidentalisht në banesën e motrës së tij.
Sipas informacioneve paraprake, 62-vjeçari, banues në Bilisht, kishte shkuar për vizitë te motra kur dyshohet se ka rrëshqitur në ambientet e tualetit. Si pasojë e rrëzimit, ai ka pësuar dëmtime të rënda në kokë.
Menjëherë pas ngjarjes, familjarët kanë njoftuar shërbimin e urgjencës dhe i moshuari është transportuar me ambulancë drejt Spitalit Rajonal të Korçës. Pavarësisht përpjekjeve të mjekëve, ai nuk ka arritur t’u mbijetojë plagëve të marra.
Policia ka nisur veprimet procedurale për zbardhjen e plotë të rrethanave të ngjarjes, ndërsa trupi i pajetë do t’i nënshtrohet ekspertizës mjeko-ligjore, e cila pritet të përcaktojë shkakun e saktë të vdekjes.
