Meksika ka shënuar të infektuarit më të rinj me koronavirus. Bëhet fjalë për trinjakë të porsalindur, të cilët rezultuan pozitivë në ditën kur erdhën në jetë.
Sekretarja e Shëndetit në San Luis Potosi, Monica Rangel tha se trinjakët lindën më 8 maj, nga një nënë, e cila ishte gjithashtu bartëse e virusit, por asimptomatike.
Kjo nuk është hera e parë që fëmijë të porsalindur rezultojnë pozitiv me koronavirus, por mbetet sërish diçka e rrallë.
Dy prej fëmijëve janë asimptomatikë, ndërsa njëri është vendosur në ventilator.
Zakonisht fëmijët e prekur me Covid-19 kanë më pak simptoma se të rriturit dhe me sa duket, impakti i infeksionit në shëndet rritet me moshën.
Meksika ka deri më tani 191,410 raste të konfirmuara me koronavirus dhe 23,377 viktima. Në fakt, një numër i tillë, i ulët për popullësinë e Meksikës, mendohet të jetë për shkak të testimeve të pakta që vendi bën.
