Donald Trump-i deklaron se një grup miliarderësh janë të gatshëm të blejnë TikTok-un, duke shtuar se mund të kërkohet edhe miratimi i Kinës
Në një intervistë për Fox News këtë të dielë, presidenti amerikan Donald Trump zbuloi se një grup individësh shumë të pasur janë pranë finalizimit të blerjes së aplikacionit të njohur TikTok. Sipas tij, ky zhvillim mund të kërkojë edhe miratimin e autoriteteve kineze.
“Ne tashmë kemi një blerës për TikTok, për hir të së vërtetës”, tha Trump-i, duke shtuar se “ka të ngjarë që do të duhet aprovimi i Kinës. Mendoj se presidenti Xi do ta bëjë këtë.” Ai nuk dha emra konkretë, por premtoi se do të zbulojë më shumë detaje brenda dy javësh.
Kjo nuk është hera e parë që Trump-i e përmend idenë e një shitjeje të TikTok. Prej kohësh ai ka shtyrë miratimin e një projektligji që detyron pronarin aktual të platformës, ByteDance, të heqë dorë nga kontrolli mbi aplikacionin në SHBA, përndryshe ai do të ndalohet.
Në fillim të vitit, Trump-i sugjeroi që zgjidhja më e mirë mund të ishte një ndërmarrje e përbashkët mes pronarëve ekzistues dhe investitorëve të rinj, ku Shtetet e Bashkuara do të zotëronin 50% të platformës. Sipas tij, kjo do të përfaqësonte një ndarje të drejtë dhe strategjike.
Ndërkohë, presidenti ka përmendur edhe disa emra të njohur që mund të ishin të interesuar për blerjen e TikTok-ut, përfshirë bashkëthemeluesin e Oracle, Larry Ellison, dhe miliarderin Elon Musk. Megjithatë, ai vetë la të kuptohej se kandidatura e Musk-ut tani është më pak e mundshme.
Çështja e TikTok-ut ka qenë prej kohësh pjesë e një debati të ashpër mes Uashingtonit dhe Pekinit për sigurinë kibernetike, të dhënat personale dhe ndikimin kulturor të teknologjive kineze në Perëndim.
Nëse kjo marrëveshje do të finalizohet me të vërtetë, mbetet për t’u parë. Por deklaratat e Trump kanë shtuar edhe më shumë tension mbi të ardhmen e aplikacionit që ka fituar miliona përdorues në mbarë botën.
