Presidenti amerikan Donald Trump ka shprehur optimizëm për përfundimin e luftës mes Rusisë dhe Ukrainës, duke paralajmëruar një marrëveshje të madhe paqeje që mund të ketë ndikim përtej dy vendeve në konflikt. “Do të ketë një marrëveshje. Do të jetë një marrëveshje e madhe dhe do të përfshijë më shumë sesa Ukrainën. Mund të përfshijë edhe gjithë Europën”, deklaroi Trump para gazetarëve, pa dhënë detaje konkrete mbi kushtet e mundshme të saj.
Deklarata e presidentit amerikan erdhi pas një takimi në Shtëpinë e Bardhë me Kirill Dmitriev, të dërguarin special të presidentit rus Vladimir Putin. Trump konfirmoi se kishte takuar përfaqësuesin e Moskës, por jo delegacionin ukrainas, i cili ndodhej gjithashtu në Shtëpinë e Bardhë në kuadër të kontakteve diplomatike. Sipas tij, marrëveshja e mundshme do të ishte një zhvillim i rëndësishëm dhe do të kënaqte të gjitha palët.
Ndërkohë, në kuadër të përpjekjeve për t’i dhënë fund konfliktit, përfaqësues të SHBA-së, Rusisë dhe Ukrainës pritet të zhvillojnë bisedime në Abu Dhabi më 10 dhe 11 nëntor. Megjithatë, pavarësisht optimizmit të Trump, ende nuk ka një marrëveshje konkrete dhe asnjë garanci se palët do të bien dakord për kushtet e paqes. Për momentin, fundi i luftës mbetet më shumë një premtim diplomatik sesa një realitet i konfirmuar.
