Presidenti i SHBA-së, Donald Trump, ka njoftuar planin për krijimin e një “Force për Inteligjencën Artificiale” dhe emërimin e një “Cari” për këtë sektor. Në një postim në Truth Social, Trump tha se administrata e tij nuk do ta pengojë rritjen e industrisë së inteligjencës artificiale, por do ta mbështesë dhe mbikëqyrë atë, duke theksuar se abuzimet do të trajtohen përmes sistemit ekzistues të drejtësisë.
Trump e krahasoi nismën e re me krijimin e Forcës Hapësinore gjatë mandatit të tij të parë. Sipas tij, inteligjenca artificiale përfaqëson “revolucionin e ardhshëm industrial” dhe mund të arrijë një ndikim të konsiderueshëm në ekonominë amerikane. Ai deklaroi gjithashtu se SHBA-ja aktualisht po udhëheq në këtë fushë ndaj Kinës dhe vendeve të tjera dhe se synon ta ruajë këtë avantazh.
Në një tjetër postim, Trump propozoi ndryshimin e termit “Inteligjencë Artificiale”, duke e cilësuar atë si të pasaktë dhe jo elegant. Ai hodhi në votim tre alternativa: “Inteligjencë Superiore”, “Inteligjencë Ekstreme” dhe “Inteligjencë Supreme”, duke u kërkuar ndjekësve të tij të votojnë për emërtimin që e konsiderojnë më të përshtatshëm.
