TikTok-u do të vazhdojë të funksionojë në SHBA deri më 17 shtator 2025, pasi Presidenti Donald Trump firmosi një urdhër të ri ekzekutiv për shtyrjen e afatit të mbylljes me 90 ditë.
Presidenti i Shteteve të Bashkuara, Donald Trump, ka miratuar një urdhër të ri ekzekutiv, duke shtyrë për 90 ditë afatin për mbylljen e aplikacionit TikTok. Ky vendim i fundit lejon funksionimin e platformës deri më 17 shtator 2025.
Lajmi është bërë i ditur nga Sekretarja e Shtypit e Shtëpisë së Bardhë, Karoline Leavitt, gjatë një deklarate për mediat të mbajtur të martën. Sipas saj, ky vendim synon të krijojë një afat shtesë për finalizimin e një marrëveshjeje të mundshme që do të garantonte sigurinë e të dhënave të përdoruesve amerikanë.
TikTok ishte parashikuar të ndalohej përfundimisht në SHBA pas afatit të janarit, për shkak të refuzimit të kompanisë kineze ByteDance për ta shitur platformën një blerësi amerikan. Kjo masë vjen si pjesë e shqetësimeve të përsëritura të administratës Trump për privatësinë dhe përdorimin e të dhënave nga palë të treta të huaja.
Sipas Leavitt, zgjatja e afatit është vendosur me qëllim që “të lejohet finalizimi i marrëveshjes dhe të garantohet që përdoruesit amerikanë të ndihen të mbrojtur kur përdorin aplikacionin TikTok.”
Administrata amerikane ka bërë të qartë se nuk do të tolerojë asnjë platformë që rrezikon sigurinë kombëtare ose të dhënat personale të qytetarëve. TikTok është vënë nën vëzhgim të vazhdueshëm nga autoritetet për shkak të lidhjeve të tij me qeverinë kineze.
Ndërkohë, kompania ByteDance nuk ka dhënë ende një reagim zyrtar lidhur me këtë vendim të fundit. Burime nga brenda industrisë sugjerojnë se bisedimet për një blerje të mundshme janë ende në proces.
Përkohësisht, përdoruesit në SHBA mund të vazhdojnë të përdorin TikTok pa kufizime, por me një afat të qartë për përfundimin e situatës së paqartë që ka shoqëruar këtë platformë.
Në muajt në vijim, do të jetë vendimtare nëse ByteDance arrin të arrijë një marrëveshje që i përmbush kërkesat e SHBA-së, ose nëse aplikacioni do të përballet me ndalim të plotë pas shtatorit.
