Detaje të reja janë zbardhur lidhur me trupin e pajetë të gjetur më herët gjatë ditës në zonën e Zhejës, në Kurbin.
Burime nga Policia bëjnë me dije se trupi, i cili ndodhej në gjendje të dekompozuar, dyshohet se i përket një shtetasi francez rreth 61-vjeç, me inicialet G.P.
Sipas të dhënave të deritanishme, 61-vjeçari dyshohet se kishte shkuar në zonën e “Përroit të Zall Frashërit”, në fshatin Zhejë, për ta vizituar atë. Paraprakisht, nuk përjashtohet mundësia që vdekja të ketë ardhur për shkaqe natyrale.
Trupi u zbulua pas njoftimit të autoriteteve nga banorë të zonës, ndërsa në vendngjarje mbërriti grupi hetimor, i cili vijon verifikimet për të përcaktuar identitetin e personit dhe rrethanat e sakta të vdekjes.
Pavarësisht dyshimeve të para, shkaku i vdekjes dhe identiteti i personit mbeten për t’u konfirmuar zyrtarisht. Pritet që ekspertiza dhe hetimet të hedhin më shumë dritë mbi ngjarjen.
