Christopher Dunn nga Missouri, i cili kaloi më shumë se 30 vjet në burg për një krim që s’e kishte kryer, u lirua të martën pasi gjykatësi hodhi poshtë dënimin e tij për vrasje.
Dunn ka pohuar prej kohësh se nuk kishte gisht në vrasjen e Ricco Rogers-it, 15 vjeç, i cili u qëllua për vdekje më 18 maj 1990 teksa ishte ulur në verandën e shtëpisë. Ndonëse nuk kishin asnjë provë për këtë akuzë, ai u dënua për vrasje të shkallës së parë dhe u dënua me burgim të përjetshëm pa mundësinë e lirimit me kusht.
Midwest Innocence Project tha në një deklaratë: “Jemi të emocionuar që Chris-i më në fund do të ribashkohet me familjen e tij pas 34 vjetësh prapa hekurave për një krim që nuk e ka kryer. Mezi presim ta mbështesim atë teksa rindërton jetën e tij”.
Nëna dhe motra e Dunn-it kishin thënë se ai ishte në shtëpi me ta kur ndodhi vrasja. Dënimi u bazua në dëshminë e dy dëshmitarëve të rinj, 12 dhe 14 vjeç, që thanë se kishin parë të shtënat. Më vonë dëshmitarët hoqën dorë nga dëshmia dhe thanë se ishin detyruar nga prokurorët dhe policia.
