Zbulohen detaje të reja në lidhje me vrasjen e 39-vjeçarit shqiptar, Bledar Dedja, i cili u gjet i masakruar me thikë mëngjesin e së dielës së 21 janar, në një pyll në Paderno del Grappa në Itali.
Hetuesit e shtetit fqinj kanë marrë në pyetje dhe një grua shqiptare rreth të 30-ave e cila dyshohet që ka pasur një lidhje jashtëmartesore gjatë dy viteve të fundit me viktimën. Në deklarimet e saj të dhëna pranë autoriteteve gruaja ka pranuar lidhjen dhe ka zbuluar se është njohur me 39-vjeçarin në një aplikacion takimesh online. Shqiptarja ishte në mesin e shumë personave që policia italiane ka marrë në pyetje për vrasjen e 39-vjeçarit, ku fokusi i hetimeve është përqendruar pikërisht te krimi i pasionit.
Dyshohet se shqiptari ishte një përdorues i rregullt i aplikacionit të takimeve online dhe mund të jetë takuar aty dhe me personin që e ekzekutoi. Dedja, i cili ishte i martuar dhe kishte dy fëmijë, bënte një jetë të dyfishtë, për të cilën bashkëshortja e tij nuk kishte dijeni.
Sipas autopsisë, 39-vjeçari vdiq nga gjakderdhja e brendshme e shkaktuar nga plaga me thikë, e marrë nga pas dhe që i përshkroi mushkrinë. Mbi trupin viktimës u qëlluan të paktën 19 herë me thikë në pjesën e gjoksit dhe të barkut, duke dëshmuar dhe urrejtjen e vrasësit. Dedja u gjet rreth 100 metra larg makinës së tij, i shtrirë përtokë, gjysmë i zhveshur, me pantallona dhe të brendshmet e hequra.
Hetuesit krahas autopsisë morën mostra për teste toksikologjike, për të përcaktuar nëse 39-vjeçari kishte kryer apo jo marrëdhënie seksuale përpara se të vritej. Dyshimi i hetuesve, nisur edhe nga kushtet në të cilat u gjet kufoma, është se Bledari mund të jetë goditur me thikë në fund të një takimi intim.
Zona ku u zbulua trupi mëngjesin e së dielës, njihet si një zonë e izoluar. Hetuesit, të cilët kanë intervistuar prej kohësh bashkëshorten dhe të njohurit e tij, tashmë janë fokusuar tek celulari i viktimës, për të analizuar telefonatat dhe mesazhet e fundit që Dedja ka pasur përpara ngjarjes.
Portofoli dhe sendet personale të 39-vjeçarit janë gjetur në vendngjarje duke rrëzuar pistën e grabitjes. Hetuesit po analizojnë dhe makinën e shqiptarit për të siguruar ndodnjë provë që mund t’i çonte drejt zbardhjes së ngjarjes. Dedja, sipas autopsisë, është goditur në pozicion të shtrirë. Ai kishte plagë të shumta sipërfaqësore, në parakrahë dhe në pëllëmbët e duarve, shenjë kjo që tregon sipas hetuesve që ai ka tentuar të mbrohej.
39-vjeçari, baba i dy fëmijëve, punonte si kopshtar dhe pastrues në Itali. Trupi u gjet në një pellg gjaku nga një mik me të cilin burri duhej të shkonte për peshkim mëngjesin e së dielës. Gruaja e tij, e shqetësuar se nuk ishte kthyer në shtëpi të shtunën në mbrëmje, ngriti alarmin në polici në orën 8 të mëngjesit të së dielës. Sipas gjetjeve të autopsisë, vrasja ka ndodhur gjatë pasdites të së shtunës, ndonëse është e vështirë të gjurmohet koha e saktë pasi trupi ka qenë i ekspozuar ndaj të ftohtit gjatë gjithë natës.
