Një 53-vjeçar shqiptar ka përjetuar momente të frikshme pasditen e kësaj të shtune në Itali, teksa ndodhej në ujërat e lumit Piave, në zonën e Fagarè, pjesë e komunës San Biagio di Callalta.
Ngjarja ndodhi rreth orës 15:10, kur ai u vu re që hasi vështirësi brenda në ujë teksa po lahej, duke alarmuar kalimtarët, të cilët lajmëruan shërbimet e emergjencës.
Menjëherë në vendngjarje ndërhynë zjarrfikësit, një helikopter emergjence, personeli mjekësor dhe karabinierët e Oderzo-s. Falë ndërhyrjes së shpejtë, 53-vjeçari, me origjinë shqiptare dhe banues në Ponte di Piave, u shpëtua në kohë dhe iu dha ndihma e parë.
Më pas, ai u transportua në spitalin e Oderzo-s, ku fatmirësisht ndodhet jashtë rrezikut për jetën. Sipas të dhënave paraprake, dyshohet se shqiptari ka pësuar një shqetësim të papritur shëndetësor teksa notonte, çka i pamundësoi daljen e tij të sigurt nga uji.
Ndërhyrja e shpejtë e autoriteteve ka shmangur pasojat më të rënda dhe ka bërë të mundur shpëtimin e jetës së tij.
