Aktori i famshëm i Broadway, Nick Cordero ka ndërruar jetë për shkak të koronavirusit. Ai ishte vetëm 41 vjeç dhe po luftonte me virusin prej 95 ditësh.
E shoqja e Cordero-s, Amanda Kloots, e cila i mbante ndjekësit të informuar vazhdimisht mbi gjendjen e aktorit, ka konfirmuar lajmin e dhimbshëm.
“Zoti ka një ëngjëll tjetër në parajsë tani. Bashkëshorti im i dashur ndërroi jetë këtë mëngjes. Ai ishte i rrethuar me dashuri nga familja e tij, duke u lutur dhe kënduar, ndërkohë që u largua nga kjo botë,” –ka shkruar Kloots dje në Instagram.
Cordero u shtrua në spital më 30 mars, ndërsa më 1 prill u vendos në ventilator. Ai pësoi disa komplikime të njëpasnjëshme, përfshirë shok septik dhe dy “mini goditje”. Mjekëve iu desh t’i amputonin këmbën e djathtë, për shkak të koagulimit të gjakut.
Më 13 maj aktori u zgjua nga koma, por gjendja e tij vazhdonte të ishte kritike, derisa dje ai dha frymën e fundit.
View this post on Instagram