Lëvizja Vetëvendosje ka publikuar një grumbull fotografish nga tubimi publik që mbajti sot në sheshin “Skënderbeu” të Prishtinës.
Partia e Albin Kurtit, nëpërmjet një postimi në Facebook, ka përcjellë edhe citat nga fjalimi i kryetarit të saj, i cili masës së mbledhur në shesh i ka thënë se ‘i gjithë pushteti do të jetë në duart tona’.
“Në fjalën e tij, mes ngazëllimit të të pranishëmve me plot dashuri për vendin dhe Lëvizjen, Kryetari Kurti tha se, “këtë vit dhe vitin që vjen neve do të na ngelet i gjithë pushteti në duart tona, pushteti qendror këtu, por edhe ai lokal nëpër komuna. Kjo do të na gëzojë shumë, por duhet edhe të na brengosë për punët e shumta dhe përgjegjësinë e madhe që do ta kemi. Bëhuni gati për pushtetin. Do të ikë kjo Qeveria Koti, e ne nuk kemi kohë për të humbur, nuk kemi kohë koti”, thuhet në njoftimin e VV-së.
Megjithëkëtë, shqetësues mbetet fakti se si në këtë tubim nuk është respektuar aspak distanca, mbajtja e së cilës ishte një ndër rekomandimet më të shpeshta që bënte VV sa ishte në pushtet, përkatësisht ministri i Shëndetësisë që vinte nga kjo parti, Arben Vitia.
