![Vetëvritet nënkomisari i Policisë Durrës](https://tvanews.com/wp-content/uploads/2024/01/policia-ambulance-770x433-1-650x365.jpg)
Një ngjarje e rëndë u regjistrua pasditen e kësaj të enjte në ambientet e Policisë së Durrësit, ku një punonjës policie i ka dhënë fund jetës me armën e shërbimit.
Bëhet fjalë për nën-komisar Arben Pjeçi, me një përvojë gati 35-vjeçare në radhët e uniformave blu. Kanë qene familjarët e tij që kanë njoftuar humbjen e kontakteve me të afërmin e tyre, dhe më pas Policia e Durrësit ka nisur punën për gjetjen e tij.
Rreth orës 16:15 oficerët e Policisë Gjyqësore kanë hapur me forcë derën e zyrës së efektivit Arben Pjeçi në Komisariatin e Durrësit, i cili u gjet brenda i vetëvrarë me armën e shërbimit. Pjeçi ishte i dënuar me vendim të formës së prerë nga Gjykata e Durrësit për veprën penale “plagosje e lehtë”, dënim që i kushtëzonte marrëdhëniet e punës me Policinë e Shtetit.
Gjetur në kushte depresioni, mendohet se efektivi me detyrë specialist i Policisë Kriminale i ka dhënë fund jetës me armën e shërbimit.
Lidhur me hetimet e ngjarjes është krijuar një grup i posaçëm hetimor, në drejtimin e Prokurorisë së Durrësit dhe oficerëve të Policisë Gjyqësore të Prokurorisë. Për këtë ngjarje në dijeni është dhe Agjencia e Mbikëqyrjes Policore.