Alpinistja nga Kosova, Mrika Nikqi, ka rënë pre e një sulmi seksual në qytetin e Pejës. Ka qenë vetë ajo që ka publikuar në rrjetin e saj social “Facebook”, videon e marrë nga kamerat e sigurisë të bizneseve rreth vendngjarjes.
Kjo ngjarje, sipas saj, ka ndodhur tri ditë më parë, më 27 shtator në qendër të Pejës.
Nikqi ka bërë me dije se personi, i cili e ka sulmuar, është identifikuar nga autoritetet me iniciale F.B., dhe më pas është arrestuar.
“Shokë e shoqe, po ju njoftoj për një rast i cili më ka tmerruar plotësisht! Më datë 27. 09.2022, në ora 20.50, në qendër të qytetit të Pejës isha viktimë e sulmit seksual, veprim vandal i cili është kryer me paramendim nga personi F.B, anëtar i një familje të njohur në qytetin e Pejës”, ka shkruar ajo.
Vajza nga Kosova shprehet se është në gjendje të rëndë psikologjike dhe emocionale dhe se nuk mund të deklarohet në tërësi.
https://www.facebook.com/mrika.nikqi/videos/618848633221856/?t=5
“Pas vendimit të plotfuqishëm të Gjykatës do të ju njoftoj për rrjedhën e situatës dhe sulmuesin e paskrupullt. Në videon e bashkangjitur, e gjykoni vetë këtë gjest të shëmtuar, viktimë e të cilit ka mundur të jetë çdo familjarë i juaji”, ka shkruar ajo.
Sipas saj, personi i dyshuar është identifikuar dhe arrestuar.
“Unë dhe familja u jemi mirënjohës organeve kompetente dhe qytetarëve të cilët me angazhimin e koordinuar, dhe shumë shpejtë, mundësuan identifikimin dhe arrestimin e sulmuesit i i cili ka lënë një vragë të shëmtuar në jetën time”, përmbyll Nikqi.