Milani e nis me fitore dhe tre pikë të rëndësishme vitin 2021. Kuqezinjtë triumfuan 0-2 në fushën e Beneventos, një sfidë që u komplikua pas daljes me të kuqe të Sandro Tonalit në pjesën e parë.
Minuta e 15-të solli golin e parë. Ante Rebic fitoi një penallti dhe Franck Kessie nuk gaboi nga pika e bardhë. Në minutën e 34-t u vështirësua gjithçka për miqtë. Sandro Tonali kreu një faull të rëndë dhe arbitrit kryesor i tregoi të kuqin pasi pa edhe njëherë pamjet në VAR.
Avantazhi numerik i dha zemër djemve të Pippo Inzaghit, por kuqezinjtë treguan forcën e dytë në minutën e 49-të. Rafael Leao përfitoi nga një pasiguri e Beneventos dhe realizoi një gol shumë të bukur.
Vendasit kishin një shans fantastik për të rihapur takimin pas një ore lojë. Tjetër penallti, kësaj radhe për “Shtrigat”, por Caprari e dërgoi topin jashtë. Kaq për këtë ndeshje, Milani menaxhoi avantazhin e dyfishtë deri në fund dhe siguroi fitoren.
Suksesi i sotëm vazhdon të mbajë “Djallin” në krye të Serie A me 37 pikë, një më shumë se Interi ndjekës. Sfida e radhës për skuadrën e Piolit është në mesjavë përballë Juventusit në mitikun “San Siro”.
Serie A, java e 15-të
Benevento-Milan 0-2
(Kessie (pen) 15′, Leao 49′)
