Kryetarja e Parlamentit Vjosa Osmani ka kritikuar qeverinë e Kosovës për heqjen e masave të reciprocitetit me Serbinë.
Qeveria Hoti shfuqizoi sot vendimet e qeverisë Kurti për masat e reciprocitetit. Kryeministri Hoti i quajti masat e reciprocitetit si ‘pengesa për bisedimet Kosovë-Serbi’, por sipas Osmanit, ato janë ‘barazi’.
Osmani theksoi se me këtë vendim, Kosova ka hequr dorë “nga e drejta për t’u trajtuar Sovran si Republikë e Kosovës”.
Në një postim në Facebook, Osmani shprehet:
“Ta quash reciprocitetin pengesë do të thotë që ti nuk beson se ke të drejta sovrane, të pavarura e të barabarta, siç janë të parapara në Deklaratën e Pavarësisë e në Kushtetutën e vendit.
Të heqësh dorë nga e drejta për t’u trajtuar i barabartë do të thotë të heqësh dorë nga e drejta për t’u trajtuar sovran si Republikë e Kosovës.”
Osmani është nënkryetare e Lidhjes Demokratike të Kosovës (LDK), ku bën pjesë edhe Avdullah Hoti.
Osmani ishte kandidatja e LDK-së për kryeministre në zgjedhjet e tetorit të fundit, dhe deputetja më e votuar e LDK-së dhe e dyta më e votuara në Kosovë, vetëm disa vota më pak se Albin Kurtit i LVV-së.
Ajo ka kundërshtuar partinë e saj pasi ata vendosën të rrëzojnë qeverinë e koalicionit LVV-LDK të kryeministrit Albin Kurti për mosrespektimin e kërkesës së administratës së SHBA për të hequr tarifat për mallrat serbe në mënyrë të njëanshme, menjëherë dhe pa kushte.